Kristín Pálsdóttir (Kirkjubæ)

From Heimaslóð
Jump to: navigation, search

Kristín Pálsdóttir vinnukona frá Kirkjubæ fæddist 17. mars 1817 í Saurbæ Holtum og lést 1900 í Straumfirði á Mýrum.
Foreldrar hennar voru sr. Páll Jónsson, þá aðstoðarprestur í Efraholtsþingum, síðar prestur á Kirkjubæ í Eyjum, f. 9. júlí 1779, drukknaði í Eystri-Rangá 15. september 1846, og kona hans Guðrún Jónsdóttir húsfreyja og ljósmóðir, f. 16. maí 1791, d. 14. febrúar 1850.

Systkini hennar, sem lifðu bernskuna voru:
1. Eva Hólmfríður, f. 22. janúar 1812, d. 28. maí 1866.
2. Guðrún eldri húsfreyja, f. 18. apríl 1814, d. 28. júní 1909.
3. Guðrún yngri („Gunna skálda”) húsfreyja, f. 16. október 1815, d. 3. marz 1890.
4. Solveig húsfreyja og ljósmóðir, f. 8. október 1821, d. 24. maí 1886.
5. Páll trésmíðanemi, f. 19. febrúar 1833, hrapaði til bana úr Hábarði í Elliðaey 20. ágúst 1857.

Kristín var með fjölskyldu sinni á Búastöðum í fyrstu, en síðan á Kirkjubæ til ársins 1840. Fluttist hún þá með Guðrúnu eldri systur sinni og Petreusi manni hennar að Refsstöðum í Landbroti og var vinnukona hjá þeim, en kom aftur að Kirkjubæ 1843. Á því ári eignaðist hún barn með Samúel Bjarnasyni, en missti það 9 daga gamalt úr ginklofa.
Hún var í Sjólyst 1845 hjá ekklinum Lars Tranberg, þjónustustúlka („hans pige“), þjónusustúlka hjá Solveigu systur sinni í Landlyst 1850, vinnukona hjá Árna Einarssyni og Guðfinnu Austmann á Vilborgarstöðum 1860.
Kristín fluttist til Reykjavíkur 1868 og var vinnukona hjá Solveigu systur sinni í Efra-Holti þar 1870 og 1880.
Á mt 1890 var hún skráð til heimilis hjá systursyni sínum Matthíasi Matthíassyni í Holti í Reykjavík.
Kristín lést hjá Jensínu Björgu Matthíasdóttur systurdóttur sinni og Ásgeiri Eyþórssyni í Straumfirði á Mýrum 1900.

I. Barnsfaðir Kristínar var Samúel Bjarnason, þá í Tómthúsi.
Barnið var
1. Kristín Samúelsdóttir, f. 24. apríl 1843 á Kirkjubæ, d. 3. maí 1843 úr ginklofa.

II. Barnsfaðir hennar var Tíli Oddsson bóndi í Norðurgarði, f. 6. júní 1832, drukknaði 16. júní 1883.
Barn þeirra var
2. Páll Tílason, f. 4. desember 1853, d. 12. desember 1853 úr ginklofa.


Heimildir

  • Samantekt: Víglundur Þór Þorsteinsson.
  • Íslenzkar æviskrár. Páll Eggert Ólason og fleiri. Hið íslenzka bókmenntafélag 1948-1956
  • Manntöl.
  • Prestþjónustubækur.
  • Skrudda II. Ragnar Ásgeirsson. Akureyri. Búnaðarfélag Íslands, 1958.
  • Vestur-Skaftfellingar 1703-1966. Björn Magnússon. Leiftur 1970-1973.


Þessi grein tilheyrir Æviskrám Eyjafólks eftir Víglund Þór Þorsteinsson.